„მთელი ჩემი ცხოვრება, შეიძლება ითქვას, რომ ყურძენსა და ღვინოს უკავშირდება. ჩვენს ოჯახში ვაზის კულტურასა და ქართული ღვინის კულტს თავიდანვე მნიშვნელოვანი ადგილი ეჭირა. ალბათ, სწორედ ამ ფაქტორმა განაპირობა ის, რომ გადავწყვიტე, ქართული მეღვინეობის განვითარებაში საკუთარი წვლილი შემეტანა. 2001 წელს, როდესაც კომპანია „კახური ტრადიციული მეღვინეობა“ დავაარსე და ჯერ კიდევ ახალგაზრდა მეღვინე ვიყავი, ჩემში აღტაცებასა და აღფრთოვანებას იწვევდა ქართული ვაზის უსაზღვრო შესაძლებლობები, გემოები და არომატები, რომლებსაც ყოველი ახალი ჯიშის ყურძნის დაწურვისას ვგრძნობდი და ასე გრძელდება დღემდე.
კომპანიამ „კახური ტრადიციული მეღვინეობა“ საკმაოდ საინტერესო და გრძელი გზა განვლო და ამ დროის განმავლობაში KTW ჯგუფმა ჰოლდინგის სტატუსი მოიპოვა. ჩემთვის საამაყოა, რომ KTW ჯგუფში დაახლოებით 2500-ზე მეტი ადამიანია დასაქმებული, რომლებიც მათი კომპეტენციის ფარგლებში იმ სანდო ღირებულებებს ქმნიან, რომლებსაც „კახური ტრადიციული მეღვინეობა“ წარმოადგენს. ჩვენი ჯგუფი ხარისხზე, ქართული ტრადიციებისა და თანამედროვე ტექნოლოგიების შერწყმის ბალანსზეა ორიენტირებულია, რათა, პირველ რიგში, პირნათელები ვიყოთ ჩვენს მომხმარებლებთან, მუდმივად შევთავაზოთ მათ სიახლეები და შევინარჩუნოთ ქართული სული ჩვენს თითოეულ პროდუქტში“